細個嘅時候，媽媽間唔中會帶我同妹妹去麥當當食早餐，我就一定揀「熱香餅套餐🥞🥞」！仲一定將浸滿糖漿🍯嘅熱香餅夾住豬柳🐷一齊食 ， 甜與鹹嘅配搭簡直天衣無縫🤤🤤
隨住當上營養師後，當然知道我深愛嘅熱香餅套餐有幾咁邪惡啦😈😢😢
就算乖乖咁走曬牛油走曬糖醬，都有成600kcal熱量，係一般女士每日熱量所需嘅40%左右 (以50公斤健康成年女士為例嘅話)‼️
一份含約15克飽和脂肪，超出咗一般成年人每日攝取上限50% (美國心臟協會建議每日來自飽和脂肪嘅熱量攝取不超過全日需要嘅5至6%)
一份含約1200毫克鈉，亦高達世界衛生組織每日攝取量上限嘅60%！
假如我朝朝都食一個咁豐富嘅早餐，一個月後起碼肥5磅之外，三高風險一定直線上升！
想食得健康又要滿足味蕾？唯有落手落腳自己整啦🍳💪💪
食 譜 ：熱 香 餅 早 餐 ( 2 人 份 )
熱香餅 (共6塊)
材料：
低筋麵粉 80克、雞蛋 1隻、低脂牛油 1湯匙、較低脂乳清芝士(Ricotta Cheese) 1湯匙、泡打粉 1/2茶匙、脫脂奶 125毫升
做法：
將雞蛋、低脂牛油(已溶)及脫脂奶攪拌均勻
篩入麵粉和泡打粉，拌至沒有粉粒
將Ricotta Cheese拌入 (無需完全攪拌均勻，吃的時候口感會更佳)
易潔鑊裡加少許油加熱，倒入粉漿 (2湯匙粉漿 = 1塊熱香餅)，以慢火煎至熱香餅表面冒泡、變成金黃色，然後轉另一面再煎約1分鐘，即成 (然後可以淋上無糖糖漿~)
豬柳 (共2塊)
材料： 豬柳 160克、鼠尾草(Sage) 1/2茶匙、百里香(Thyme) 1/2茶匙、蒜鹽 1/4茶匙、黑胡椒 1/2茶匙、辣椒粉 1/4茶匙、砂糖 1/2茶匙
做法：
用攪拌器將豬肉攪碎
加入鼠尾草、百里香、蒜鹽、黑胡椒、辣椒粉及砂糖，攪拌均勻
用手將豬肉形成漢堡扒形狀
易潔鑊裡加少許油加熱，以中火每面煎約3分鐘或煎至金黃色即成
薯餅 (共2塊)
材料： 薯仔 1/2中個 (約90克)、鹽 少許
做法：
煮滾一鍋水，加入薯仔用中小火煮15分鐘
把煮熟的薯仔去皮，再以刨絲器刨成粗絲
用手將薯仔絲形成薯餅形狀
易潔鑊裡加少許油加熱，以慢火將薯餅煎至金黃色即成
熱量(每份)：430kcal 食物換算：五穀 2.5份 / 蛋白質 3份 / 奶品 0.5份 / 脂肪 1份
GRACE'S TIPS:
唔自己整，麥當當有咩Keep Fit早餐選擇？
Mini雜菜蛋扭扭粉 ~163 kcal (1.5份五穀 + 1份蛋白質 + 0.5茶匙油)
煙肉蛋漢堡 (走牛油) ~220 kcal (1.5份五穀 + 2份蛋白質)
麥芝蛋包 (走醬) ~260 kcal (2份五穀 + 1.5份蛋白質 + 1茶匙油)
板燒雞腿扭扭粉 (去皮) ~330 kcal (3份五穀 + 3份蛋白質)
Comments